Монгол Улсын анхны Ерөнхийлөгч, Бүгд Найрамдах Монгол Ард Улсын Ардын Их Хурлын Тэргүүлэгчдийн дарга, “Чингис хаан” тэргүүн зэргийн одонт, төр нийгмийн нэрт зүтгэлтэн Пунсалмаагийн Очирбат таалал төгссөнтэй холбогдуулан улс орон даяар гашуудал зарлах тухай Монгол Улсын Ерөнхийлөгчийн зарлиг гарсан.
Монгол Улсын Төрийн далбааг 2025 оны 01 дүгээр сарын 24-ний өглөө 7:00 цагаас эхлэн 25-ны өдрийн 00:00 цаг хүртэл орон даяар 45 хэм бөхийлгөж, бүтэн өдрийн турш гашуудал зарлаж буй.
Монгол Улсын анхны Ерөнхийлөгч, Төр, Нийгмийн нэрт зүтгэлтэн Пунсалмаагийн Очирбат агсанд хүндэтгэл үзүүлэх төрийн ёслолын ажиллагаанд Ховд аймгийн төр захиргааны байгууллага, орон нутгийн удирдлагууд, төрийн албан хаагчид, иргэдийн төлөөлөл нэгдэж, салах ёс гүйцэтгэн, эмгэнэл илэрхийллээ.
